ФАҚАТ СИФАТЛИ ҚУРИЛГАН ЙЎЛЛАР ҚАБУЛ ҚИЛИНАДИ

Мамлакат Президентининг 2019 йил 9 декабрдаги ПФ-5890-сонли Фармони билан Автомобиль йўллари қўмитаси – умумий фойдаланишдаги автомобиль йўлларини лойиҳалаш, қуриш, реконструкция қилиш, таъмирлаш ва эксплуатация қилиш бўйича ягона буюртмачи экани белгилаб қўйилган. Буюртмачилик функцияси эса қўмита таркибидаги – “Умумий фойдаланишдаги автомобиль йўлларини қуриш ва реконструкция қилиш дирекцияси” ҳамда вилоятлардаги Минтақавий йўлларга буюртмачи хизмати ДУКлар томонидан амалга оширилиб келинмоқда.

Жорий йилги Инвестиция дастурига киритилган – умумий фойдаланишдаги жами узунлиги 798,8 км бўлган 68 та автомобиль йўлларидан 126,3 км узунликдаги 28 та,  жами узунлиги 3130,4 п.м. бўлган 17 та кўприк ва йўл ўтказгичлардан узунлиги 2312,4 п.м. бўлган 11 объектни, мукаммал таъмирлаш дастурига киритилган – жами узунлиги 435,3 км бўлган 88 та объектдан узунлиги 105,5 км бўлган 27 та, жами узунлиги 785,7 п.м. бўлган 5 та кўприк ва йўл ўтказгичларни мукаммал таъмирлаб, 2022 йилнинг ўзида фойдаланишга топшириш режалаштирилган.

Шунингдек Ўзбекистон Президентининг 2022 йил 18 майдаги қарорига асосан, Қорақалпоғистон Республикаси, вилоятлар ва Тошкент шаҳрида 2606 км узунликдаги цемент-бетон қопламали йўлларни қуриш ҳамда шу йилнинг 18 мартидаги 2022-2026 йилларда “Обод қишлоқ” ва “Обод маҳалла” дастурларини амалга ошириш чора-тадбирлари тўғрисидаги қарори билан 5113,2 км узунликдаги ички йўлларни таъмирлаш параметрлари тасдиқланган.

2006 йил 1 январда эса ҳукуматнинг 226-сонли қарори билан “Автомобиль йўлларини қуриш, реконструкция қилиш ва мукаммал таъмирлаш бўйича бажарилган ишларнинг сифати устидан назорат қилиш ва уларни қабул қилиб олиш тартиби тўғрисида” Низом тасдиқланган. Мазкур ҳужжат умумий фойдаланишдаги автомобиль йўлларини, хўжаликлараро қишлоқ автомобиль йўлларини, шаҳарлар, шаҳар посёлкалари, қишлоқлар ва овуллар кўчаларини қуриш, реконструкция қилиш ва мукаммал таъмирлаш бўйича бажарилган ишларнинг сифати устидан назорат қилиш ва уларни қабул қилиб олиш тартибини белгилайди.

Низомда реконструкция қилинган ҳамда қурилиш ва мукаммал таъмирлаш ишлари тугалланган объектларни манфаатдор ташкилотлар ҳамда Транспорт вазирлиги ҳузуридаги Йўл-қурилиш ишлари сифатини назорат қилиш инспекцияси вакилларидан иборат қабул комиссиялар томонидан фойдаланишга қабул қилиниши аниқ қилиб белгилаб қўйилган.

Жорий йилнинг ўтган 7 ойи давомида юқорида номи келтирилган буюртмачи корхоналар томонидан 133 та тугалланган объектни фойдаланишга қабул қилиш, комиссиялар ишида иштирок этиш учун мутахассис ажратиш сўралиб, “Ўзйўлинспекция”га мурожаат қилинган.

Шундан 35 та объект (50,8 км) ишчи ва давлат қабул комиссиялари томонидан қабул қилиниб, фойдаланишга топширилган. 19 та объект эса дастлабки, яъни ишчи қабул комиссиялари томонидан қабул қилингач, давлат қабул комиссияларига тақдим этилди.

Қабул комиссиясига тақдим этилиши сўралган объектларнинг ярмидан кўпи (аниқроғи, 79 таси) “Ўзйўлинспекция”нинг тегишли ҳудудий давлат инспекторлари томонидан жойига чиқиб ўрганилганда, уларда лойиҳа-смета ҳужжатларида назарда тутилган ишлар тўлиқ бажарилмагани, қатор камчиликлар мавжудлиги, айрим ишлар сифатсиз бажарилгани аниқланди.

Уларнинг айримларини буюртмачилар кесимида санаймиз.

1. “Умумий фойдаланишдаги автомобиль йўлларини қуриш ва реконструкция қилиш дирекцияси” буюртмаси бўйича ишлар.

а) 4Р-23ж “М-39 автойўлидан – Шеробод шаҳрига кириш” автомобиль йўлининг 0-6 км қисмини реконструкция қилиш объектининг 0-2 км қисмида:

         - лойиҳа-смета ҳужжатларида назарда тутилган – автомобиль йўлининг ПК 3+07-ПК 17+21 оралиғида 17 жойда жами узунлиги  182 метр узунликдаги кириш йўллари (съездлар) қурилиши бажарилмаган;

- объектнинг ПК 3+28 даги автобуслар тўхташ майдони ва автопавильон қурилиш ишлари якунланмаган;

- йўл ёқаларига ўрнатилган сув ўтказиш ЛК-6,5 темир-бетон лотокларининг чокларини М100 цементли қоришма билан тўлдириш ишлари сифатсиз бажарилиб, лойиҳа талабларига жавоб бермайди.

б) 4Р-120 “Исковот –Косонсой –Туракурғон -Жомашуй -Сойбуйи -А373 а/й” автомобил йўлининг 49-55 км қисмини реконструкция қилиш 2-босқич объектида:

– ПК106+20 қисмидаги кўприкда қурилиш-монтаж ишлари  тўлиқ якунланмаган, идоравий қурилиш нормаси ИҚН 06-13 талаблари асосида автомобиль йўлнинг реконструкция қилингандан кейинги кўрсаткичлари меъёрий талабларга мослиги диагностика кўригидан ўтказилмаган.

в) 4Р159 “Урганч ш.-Шовот ш.-Туркманистон Республикаси чегараси” автомобиль йўлининг 34,8 км қисмидаги кўприкни реконструция қилиш объектида:

- идоравий қурилиш нормаларига мувофиқ, реконструкция ишлари якунлангач, қайта текшириш ва синов ишлари ўтказилмаган.

2. “Хоразм минтақавий йўлларга буюртмачи хизмати” ДУК буюртмаси билан амалга оширилган ишлар:

а) “Урганч шаҳар Ал-Беруний кўчасини (Шерозий кўчасидан Ғ.Ғулом кўчасигача) 0.846 км кисмини қайта қуриш” объектида йўллар бузилиб, умуман яроқсиз холатда;

 - Урганч шаҳар П.Махмуд кўчасининг 0,9 км қисмини тўла тамирлаш объектида ётқизилган асфальт-бетон қопламасининг 120 м2 юзасида бузилишлар пайдо бўлган ва тунги ёритиш чироқлари тўлиқ ўрнатилмаган.

3. “Тошкент вилояти минтақавий йўлларга буюртмачи хизмати” ДУК буюртмаси билан амалга оширилган ишлар.

а) Янгийўл шаҳридаги “Самарқанд” кўчасини мукаммал таъмирлаш объекти бўйича:

- объектнинг  ПК8+75 ўнг томонда узунлиги 14,8 м, эни 3 м, ҳажми 44,4 кв.м майдонда тротуар юзасида бузилиш ва чўкишлар ҳосил бўлган;

- ПК10+00 ПК11+00 оралиғида – эни 3 м узунлиги 15 м ҳажми 45 кв.м. бўлган майдондаги тротуарга ётқизилган брустчаткалар чўкиб, синиб, сифатсиз ҳолга келган;

- йўлнинг қатнов қисмида  ҳаракат хавфсизлигига жиддий таъсир этувчи чуқурчалар мавжуд. Канализация қудуқлари қопқоғи йўлнинг қатнов қисми билан бир сатҳда ўрнатилмаган ва ҳоказо...

“Ўзйўлинспекция” томонидан – юқорида саналган ва бошқа камчиликлар тўлиқ бартараф этилгач, объектларни фойдаланишга топшириш бўйича қабул комиссияларини шакллантириш зарурлиги ҳақида – буюртмачи корхоналарга тегишли кўрсатмалар берилди.

Хулоса сифатида айтиш мумкинки, фақатгина лойиҳа-смета ва меъёрий ҳужжатлар асосида, тўлиқ ва сифатли тугалланган объектларгина амалдаги идоравий қурилиш нормаларига мувофиқ, яъни йўллар – диагностика кўриги, кўприклар эса – қайта текшириш ва синов ишларининг ижобий хулосаси асосида қабул комиссияларига тақдим этилиши лозим. Бу ишлар буюртмачи ва пудратчи ташкилотлар ишида асосий мезон бўлиб қолмоғи керак.

Бердимурод Зохидов,

“Ўзйўлинспекция” бош бошқарма бошлиғи ўринбосари

16.08.2022

Галерея

• 
• 
• 
• 
• 
• 
• 
• 
• 
• 
• 
•